સાઉથ આફ્રિકાનો ૨૮ વર્ષનો લેફ્ટ-આર્મ મીડિયમ ફાસ્ટ બોલર નાન્ડ્રે બર્ગર મંગળવારે બીજી જ વન-ડે રમ્યો હતો અને એમાં તેણે ઋતુરાજ ગાયકવાડ (૪), તિલક વર્મા (૧૦) અને કે. એલ. રાહુલ (૫૬)ની મહત્ત્વની વિકેટ લીધી હતી. તે મૅન ઑફ ધ મૅચનો પુરસ્કાર વિજેતા બની શકે એમ હતો, પરંતુ ઓપનર ટોની ડી ઝૉર્ઝી (૧૧૯ અણનમ, ૧૨૨ બૉલ, છ સિક્સર, નવ ફોર)એ બે મોટી ભાગીદારી સાથે સાઉથ આફ્રિકાને જિતાડીને પુરસ્કાર પોતાના નામે કરી લીધો હતો.
જોકે દુબઈમાં આઇપીએલ માટે થયેલા મિની ઑક્શનમાં નાન્ડ્રે બર્ગર છેલ્લી પળોમાં છવાઈ ગયો હતો. તેને રાજસ્થાન રૉયલ્સે ૫૦ લાખની મૂળ કિંમતે ખરીદી લીધો હતો. એ વિશે તેના સાથી-ખેલાડી અને મંગળવારના ભારત સામેના મૅચવિનર ટોની ડી ઝૉર્ઝીએ તેના વિશે રમૂજી કમેન્ટ સોશ્યલ મીડિયામાં કરી હતી : ‘બર્ગરે રાજસ્થાન સાથે થયેલા ડીલની રકમ સાઉથ આફ્રિકાની ટીમ માટે વાપરવી જોઈએ, કારણ કે તેને આ સ્તર સુધી (આઇપીએલ સુધી) અમે બધાએ પહોંચાડ્યો છે. ભારત સામેની આ ટૂરમાં હું તેનો રૂમ-મૅટ છું અને હું તેની પાસેથી (ડીલની રકમમાંથી) થોડી અપેક્ષા તો રાખું જ છું.’