ક્રિસમસનો તહેવાર થોડા જ દિવસોમાં આવી રહ્યો છે. આવી સ્થિતિમાં આ તહેવારની તૈયારીઓ ઘરોમાં શરૂ થઈ ગઈ છે. આ પ્રસંગે જિંગલ્સ ગાવામાં આવે છે અને વિવિધ પ્રકારની કેક પણ બનાવવામાં આવે છે. આમ તો આજકાલ અલગ-અલગ પ્રકારની કેક બેકરી શોપ પર મળી જ જાય છે. પરંતુ ઘરે કેક બનાવવાની એક અલગ જ મજા હોય છે. આજે અમે તમને કપ કેકની ખૂબ જ સરળ રેસિપી જણાવવા જઈ રહ્યા છીએ.
તેને તમે સરળતાથી ઘરે બનાવી શકો છો. તો ચાલો જાણીએ કે ક્રિસમસના ખાસ અવસર પર કેવી રીતે ઘરે સ્વાદિષ્ટ ચોકલેટ કપ કેક (Cup Cake Recipe) બનાવી શકાય છે-
કપકેક બનાવવા માટેની સામગ્રી
4 ચમચી મેંદાનો લોટ, 3 ચમચી દળેલી ખાંડ, 1 ચમચી કોકો પાવડર, ¼ ચમચી બેકિંગ પાવડર, 2 ચપટી બેકિંગ સોડા પાવડર, 1 ચમચી બટર, થોડું ઘટ્ટ દૂધ.
ચોકલેટ કપકેક બનાવવાની રીત
કપકેક તૈયાર કરવા માટે સૌથી પહેલા એક બાઉલમાં મેંદાનો લોટ, દળેલી ખાંડ, કોકો પાવડર, બટર, બેકિંગ પાવડર અને સોડાને સારી રીતે મિક્સ કરી લો.
હવે બધી સામગ્રીમાં દૂધ ઉમેરો અને સારી રીતે મિક્સ કરી એક સ્મૂધ બેટર બનાવીને તૈયાર કરી લો. તૈયાર બેટરને કપકેકના મોલ્ડમાં અથવા કોઈ મોટા કપમાં નાખીને માઇક્રોવેવમાં રાખી દો.
તમારે માત્ર 1 મિનિટ માટે જ માઇક્રોવેવને નોર્મલ મોડ પર ચલાવવાનું છે. માઈક્રોવેવને બંધ કરીને એક ટૂથપીક વડે ચેક કરી લો, જો ટૂથપીક પર કેક ચોંટતી ન હોય તો સમજી લો કેક બની ગઈ છે.
સ્વાદ વધારવા માટે કપકેક પર ચોકલેટ સીરપ અથવા મેલ્ટેડ ચોકલેટ પણ લગાવી શકો છો. બાળકોને આ ચોકલેટ કપકેક ખૂબ જ ટેસ્ટી લાગશે.
તમે તેને કોઈપણ પાર્ટી માટે બનાવી શકો છો. આ કેકની ખાસિયત એ છે કે તેને બનાવવામાં માત્ર 1 મિનિટનો સમય લાગે છે અને તે ઇંડા વિનાની કેક છે.