જામનગરમાં અંબાણી પરિવારના નાના દીકરાના પ્રી-વેડિંગ જલસામાં અંબાણી પરિવારના દરેક સભ્યે દરેક ઇવેન્ટમાં પહેરેલાં કૉસ્ચ્યુમ્સ એક-એકથી ચડિયાતાં હતાં. જોકે આવા જ એક ફંક્શનમાં ઈશા અંબાણીએ પહેરેલું બ્લાઉઝ તો આ પહેલાં કદી બન્યું નહીં હોય એવું હતું. આ બ્લાઉઝ ફૅબ્રિક પર રિયલ ગોલ્ડ અને ડાયમન્ડ જ્વેલરી ચીપકાવીને બનાવવામાં આવ્યું હતું.
અબુ જાની અને સંદીપ ખોસલાએ આ બ્લાઉઝ ડિઝાઇન કર્યું હતું. આ બ્લાઉઝ માત્ર ફૅબ્રિક નહીં, રિયલ સેન્સમાં એક જ્વેલરી પીસ હતો એની વિગતો આપતાં તેમણે ઇન્ટાગ્રામ પર પોસ્ટ શૅર કરી હતી. મરૂન રેડ રંગના ફૅબ્રિક પર ઈશાની સોનાની જડાઉ જ્વેલરીના કલેક્શનનો ઉપયોગ કરવામાં આવ્યો હતો. સોનાની જ્વેલરીના પાર્ટ્સ તોડીને એને કાપડ પર સોનાના તારથી સીવી લેવામાં આવ્યા હતા.
જ્વેલરી ઉપરાંત હીરા, માણેક અને પન્નાના સ્ટોન્સ ગોલ્ડ જરદોસી વર્કથી બીડવામાં આવ્યા હતા. એક ઇંચ પણ જગ્યા એવી નહોતી જેમાં બ્લાઉઝનું કાપડ તમે સ્પષ્ટ જોઈ શકો. જડવામાં આવેલી મોટા ભાગની જ્વેલરી ઈશાના પર્સનલ કલેક્શનમાંથી લીધી હોવાથી એની રિયલ કિંમત કેટલી હતી એ ખબર પડી નથી.