ઇડલીનો સ્વાદ દરેકને પસંદ આવે છે. સાઉથ ઇન્ડિયન ડિશ લગભગ દરેક રેસ્ટોરન્ટમાં સરળતાથી મળી રહે છે. શિયાળામાં તમે તેમાં ટ્વિસ્ટ લાવી શકો છો. દાળ અને ચોખાની રૂટિન ઇડલી ખાધા બાદ હવે તમે મકાઇના લોટની ઇડલી ટ્રાય કરો.
તે ટેસ્ટમાં ખૂબ જ સ્વાદિષ્ટ હોય છે અને સાથે તેની મજા પણ વધે છે. શિયાળામાં મકાઈના લોટનું સેવન હેલ્થ માટે પણ લાભદાયી રહે છે. તો જાણો ઘરે જ કેવી રીતે બ્રેકફાસ્ટ માટે ફટાફટ હેલ્ધી અને ટેસ્ટી મકાઈની ઈડલી બનાવી શકાય તેની સરળ રેસિપિ.
સામગ્રી
– એક કપ મકાઇનો લોટ
– એક કપ દહીં
– બે ટીસ્પૂન તેલ
– ત્રણ ટીસ્પૂન કોથમીર
– દસ નંગ લીમડાના પાન
– અડધી ચમચી રાઈ
– એક ચમચી ચણા દાળ
– એક ચમચી અડદની દાળ
– એક બારીક સુધારેલું લીલું મરચું
– એક ઇંચ આદુનો ટુકડો
– મીઠું સ્વાદ અનુસાર
– ત્રણ ચમચી ઈનો
રીત
એક પેનમાં બે ચમચી તેલ ગરમ કરવા રાખો. તેમાં રાઈનો વઘાર કરો, તેમાં ચણા અને અડદની દાળ નાંખીને તે સોનેરી થાય ત્યાં સુધી શેકો. આદુ, મરચું અને લીમડો ઉમેરીને તેને શેકો. હવે તેમાં મકાઇનો લોટ ઉમેરો અને ત્રણ મિનિટ સુધી શેકો. આ મિશ્રણને એક અલગ વાસણમાં કાઢી લો. તેમાં મીઠું, દહીં અને કોથમીર ઉમેરો અને પાણી નાંખીને ઈડલી જેવું ખીરું બનાવો. તેને સારી રીતે હલાવીને મિક્સ કરો અને દસ મિનિટ માટે રહેવા દો. એક કૂકરમાં 2-3 કપ પાણી નાંખો અને તેને ઉકળવા રાખો. તેમાં ઇડલી સ્ટેન્ડમાં તેલ લગાવીને તેને ચિકણું કરો. હવે ઈડલીના ખીરામાં ઈનો ઉમેરો અને તેને હલાવી લો. આ મિશ્રણને ઈડલી સ્ટેન્ડમાં રાખો, કૂકર ખોલો અને સાથે 15 મિનિટ બાદ ઈડલીને ચપ્પાથી ચેક કરો. જો તે તૈયાર થઇ ગઇ હોય તો તેને ગરમાગરમ અને ચટણી સાથે પીરસો. તમે તેને લસણની ચટણી કે ગ્રીન ચટણી સાથે કે પછી સંભારની સાથે પણ પીરસી શકો છો.