રિષભ પંત IPL 2024માં રમશે કે નહીં તેનો જવાબ કોઈને ખબર નથી અને દિલ્હી કેપિટલ્સના મુખ્ય કોચ રિકી પોન્ટિંગે આ મુદ્દે જે કહ્યું છે તે પંતના ચાહકોના દિલને તોડી નાખશે. રિકી પોન્ટિંગે એક ઈન્ટરવ્યુમાં જણાવ્યું કે રિષભ પંતને વિશ્વાસ છે કે તે IPL 2024માં રમશે. પરંતુ પોન્ટિંગે આગળ કહ્યું કે કોઈને ખબર નથી કે તે કઈ ક્ષમતામાં ટીમ સાથે હશે.
પોન્ટિંગનું મોટું નિવેદન
પોન્ટિંગે કહ્યું કે સોશિયલ મીડિયા પર આવા વીડિયો ફરતા થઈ રહ્યા છે કે પંત સારી રીતે ચાલી રહ્યો છે અને સ્વસ્થ થઈ ગયો છે. પરંતુ હવે દિલ્હી કેપિટલ્સનો પ્રથમ મેચ માત્ર 6 અઠવાડિયા દૂર છે અને પોન્ટિંગ જાણતો નથી કે પંત વિકેટ કીપિંગ કરી શકશે કે નહીં.
પંતના રમવા અંગે સસ્પેન્સ!
પોન્ટિંગે કહ્યું કે હું બાંહેધરી આપી શકું છું કે જો મેં તેને પૂછ્યું કે શું તે IPL 2024માં રમશે? તો પંતનો જવાબ હશે કે તે દરેક મેચ રમી શકે છે. તે દરેક મેચમાં વિકેટકીપિંગ કરી શકે છે અને નંબર 4 પર બેટિંગ કરી શકે છે. પરંતુ દિલ્હીની ટીમ આ મામલે હજુ સુધી વિશ્વાસમાં નથી.
10 મેચ રમે તો પણ બહુ છે
પોન્ટિંગે કહ્યું કે તે પંતના ફિટનેસ રિપોર્ટની રાહ જોશે અને આશા છે કે તે IPL 2024માં રમી શકશે. પોન્ટિંગને લાગે છે કે જો પંત 14માંથી માત્ર 10 મેચ જ રમે છે તો પણ તે દિલ્હીની ટીમ માટે બોનસ હશે. પોન્ટિંગે કહ્યું કે જ્યાં સુધી પંતની ફિટનેસ અંગે બધું સ્પષ્ટ ન થાય ત્યાં સુધી ડેવિડ વોર્નર ટીમનું સુકાન સંભાળશે.
પંતની ફિટનેસ પર શંકા!
તે સ્પષ્ટ છે કે દિલ્હી કેપિટલ્સના મુખ્ય કોચ રિકી પોન્ટિંગને રિષભ પંતની ફિટનેસ પર શંકા છે. તે બિલકુલ ઈચ્છતો નથી કે પંત અધૂરી ફિટનેસ સાથે મેદાનમાં ઉતરે કારણ કે તે ટીમ અને ખેલાડી માટે નુકસાનકારક છે. જો પંત ફિટ થઈ જશે તો પણ તેના માટે આ સિઝનમાં વિકેટ કીપિંગ કરવું મુશ્કેલ બની જશે. તાજેતરમાં જ ભૂતપૂર્વ ભારતીય ક્રિકેટર ફારુક એન્જિનિયરે દાવો કર્યો હતો કે પંતને જે પ્રકારની ઈજા થઈ છે તે જોતા એવું નથી લાગતું કે તે ક્યારેય વિકેટ કીપિંગ કરી શકશે. હવે જો પંત IPL 2024માં નહીં રમી શકે તો તેના ચાહકો ખૂબ જ દુખી થશે.