ટોલીવુડ સુપરસ્ટાર જુનિયર એનટીઆર અને જ્હાનવી કપૂર સ્ટારર ફિલ્મ દેવરા પાર્ટ 1ની રિલીઝની આતુરતાથી રાહ જોવાઈ રહી છે. આરઆરઆરની બમ્પર સફળતા બાદ સુપરસ્ટાર જુનિયર એનટીઆરની આગામી ફિલ્મ દેવરા એક્શન ડ્રામા છે, જેને સમગ્ર દેશમાં રિલીઝ કરવાની યોજના છે. આ ફિલ્મને પહેલાં 5 એપ્રિલ, 2024નાં રોજ રિલીઝ કરવાની હતી. એ જોતાં ફિલ્મને રિલીઝનાં માત્ર બે મહિના જ બાકી હતા.
મેકર્સે હવે રિલીઝ ડેટમાં ફેરફાર કર્યો છે. ખુદ જુનિયર એનટીઆર અને ફિલ્મ નિર્માતાઓએ સોશ્યલ મિડિયા હેન્ડલ પર જાહેરાત કરી છે કે ફિલ્મ હવે આ વર્ષે દશેરાનાં શુભ પ્રસંગે 10 ઓક્ટોબરનાં રોજ રિલીઝ થશે.
દેવરામાં જ્હાનવી કપૂર ઉપરાંત સૈફ અલી ખાન પણ છે. ફિલ્મમાં જ્હાનવી કપૂરનો લુક સામે આવી ચૂક્યો છે પણ ફેન્સને સૈફનાં પ્રથમ લુકનો ઇન્તઝાર છે. પિક્ચરનું ટિઝર ઘણાં સમય પહેલાં રિલીઝ થઈ ગયું છે. પિક્ચરમાં શાનદાર સિનેમેટોગ્રાફી અને બેકગ્રાઉન્ડ મ્યુઝીકની ઝલર તો ટીઝરમાં જોવા મળી જ હતી. એ ઉપરાંત તેમાં મોટાં મોટા જહાજો અને જ્યાં જુઓ ત્યાં લોહી જ લોહી દેખાતું હતું…. ટીઝરમાં આ દ્રશ્યોને જોઇને આ ફિલ્મ અંગે દર્શકોની ઉત્સુકતા વધી ગઈ છે. જો કે ફિલ્મનું શૂટિંગ હજુ ચાલુ છે અને મેકર્સ કોઈ ઉતાવળ કરવા માંગતા નથી એટલાં માટે જ ફિલ્મની રિલીઝ પોસ્ટપોન કરવામાં આવી છે.
જુનિયર એનટીઆરે એક્સ પર એક પોસ્ટર શેર કર્યુ છે. આ તસવીરમાં તે જોરદાર એક્શન મોડમાં નજરે પડે છે. ફિલ્મમાં જુનિયર એનટીઆરનો ડબલ રોલ હોવાનું કહેવાય છે. જો કે ખરુ સિક્રેટ સૈફઅલી ખાન અંગેનું છે. સિનેપ્રેમીઓને એ જાણવાની ઉત્સુકતા છે કે ફિલ્મમાં સૈફ અલી ખાનનો રોલ કેવો હશે? આ અંગે હજુ સુધી કોઈ ખુલાસો નથી થયો.