IPL 2024 Schedule: ભારતમાં આવતા વર્ષે યોજાનારી લોકસભાની ચૂંટણીને કારણે IPL 2024ના આયોજનને લઈને અનિશ્ચિતતાઓ છે. આઈપીએલ ગવર્નિંગ કાઉન્સિલનો નિર્ણય કે આ લીગ આવતા વર્ષે ભારતમાં યોજવામાં આવશે કે ભારતની બહાર તે ચૂંટણી પંચ દ્વારા તારીખોની જાહેરાત પર નિર્ભર છે. સામાન્યપણે આઈપીએલનું આયોજન માર્ચથી મે દરમિયાન કરવામાં આવે છે અને આ દરમિયાન આવતા વર્ષે લોકસભાની ચૂંટણી છે, આવી સ્થિતિમાં આઈપીએલની 17મી આવૃત્તિનું આયોજન ભારતની બહાર થાય તેવી શક્યતાઓ છે.
ન્યૂઝ એજન્સી પીટીઆઈના અહેવાલ મુજબ, ચૂંટણી પંચ દ્વારા સામાન્ય ચૂંટણીની તારીખોની જાહેરાત કર્યા પછી આઈપીએલ ગવર્નિંગ કાઉન્સિલ આઈપીએલ 2024ના શેડ્યૂલ પર નિર્ણય લેશે. રિપોર્ટમાં કહેવામાં આવ્યું છે કે, “ભારતના ચૂંટણી પંચ દ્વારા સામાન્ય ચૂંટણીની તારીખોની જાહેરાત બાદ IPL ગવર્નિંગ કાઉન્સિલ શેડ્યૂલ પર નિર્ણય લેશે. ભારતમાં IPL સંપૂર્ણ રીતે યોજાશે કે આંશિક, તે ચૂંટણી પંચની જાહેરાત બાદ જ નક્કી થશે.”
અગાઉ પણ ચૂંટણીને કારણે ભારતની બહાર શિફ્ટ કરવામાં આવી છે ટૂર્નામેન્ટ
લોકસભા ચૂંટણીને કારણે IPL અગાઉ પણ ઘણી વખત શિફ્ટ કરવામાં આવી છે. આ સમગ્ર ટૂર્નામેન્ટનું આયોજન સૌપ્રથમવાર 2009માં દક્ષિણ આફ્રિકામાં કરવામાં આવ્યું હતું. જ્યારે 2014માં 5 વર્ષ બાદ ચૂંટણીના કારણે લીગનો પ્રથમ લેગ UAEમાં રમાયો હતો. જો કે, 2019માં ચૂંટણી હોવા છતાં, BCCI ભારતમાં આ ટૂર્નામેન્ટનું આયોજન કરવામાં સફળ રહ્યું હતું. હવે જોવાનું એ રહે છે કે IPL ગવર્નિંગ કાઉન્સિલ આ વખતે શું નિર્ણય લે છે.
પ્રથમ વખત આઈપીએલની હરાજી પણ દેશની બહાર યોજાશે
IPL 2024 ની હરાજી આ વખતે UAE માં થશે, આ પહેલીવાર હશે જ્યારે IPL ની હરાજી દેશની બહાર યોજાશે. એવા અહેવાલો છે કે આ હરાજી 19 ડિસેમ્બરે થઈ શકે છે.
IPL 2024 ક્યારે શરૂ થશે?
IPL 2024ના શેડ્યૂલ સાથે જોડાયેલા ઘણા અહેવાલો સામે આવ્યા છે. કહેવામાં આવી રહ્યું છે કે, આ વખતે ટૂર્નામેન્ટનું આયોજન 24 માર્ચથી 26 મે વચ્ચે થઈ શકે છે. આઈપીએલના આયોજન અંગે બીસીસીઆઈની સામે બીજી સમસ્યા ટી20 વર્લ્ડ કપ 2024 છે. નોંધનીય છે કે, T20 વર્લ્ડ કપ 2024 4 જૂન, 2024થી શરૂ થવાનો છે, આવી સ્થિતિમાં IPL એક અઠવાડિયા પહેલા પૂર્ણ થાય તે જરૂરી છે.