ઇલૉન મસ્ક હાલમાં તેમના ઑપ્ટિમસ નામના રોબોને લઈને ફરવા નીકળ્યા હતા અને સોશ્યલ મીડિયામાં છવાઈ ગયા હતા. એ પહેલાં તેમણે ઑપ્ટિમસને શર્ટ ફોલ્ડ કરતો બતાવ્યો હતો અને હવે તેમણે એક નવો વિડિયો પોસ્ટ કર્યો છે જેમાં ઑપ્ટિમસ અસલ માનવી જેવી ચાલ સાથે ચાલતો જોવા મળે છે. આ વિડિયો સાથે ઇલૉન મસ્ક લખે છે, ‘ઑપ્ટિમસ સાથે હું ચાલવા જઈ રહ્યો છું.’
વિડિયો-ક્લિપમાં રોબો એક સીધી લાઇનમાં ચાલતો જોવા મળે છે. એ એક એવા બિલ્ડિંગની અંદર ચાલી રહ્યો છે જે કોઈ પ્રકારની ફૅક્ટરી જેવું લાગે છે. રોબોની હિલચાલ એકદમ સ્મૂધ છે. એ એના પગ ઉપાડે છે અને જમીન પર મૂકે છે જાણે તે કોઈ માણસ હોય. આ પહેલી વાર નથી જ્યારે ઇલૉન મસ્કે ટેસ્લાના નવા હ્યુમનૉઇડ રોબો વિશે બધાને ચોંકાવી દીધા હોય. બે અઠવાડિયાં અગાઉ તેમણે એક વિડિયો શૅર કર્યો હતો જેમાં ટેસ્લા રોબો ફૅક્ટરીમાં કામ કરી રહ્યો હતો. ક્લિપમાં રોબોને એક બાલદીમાંથી બ્લૅક ટી-શર્ટ ઉપાડીને એને ફોલ્ડ કરતો બતાવાયો હતો.
ડિસેમ્બરમાં પણ મસ્કે એક વવિડિયો શૅર કર્યો હતો જેમાં ઑપ્ટિમસ માણસ જેવાં જ કામ કરે છે, જેમ કે સંભાળીને ઈંડાં લઈ જવાં કે ડાન્સ કરવો.