IPLમાં ગુજરાત ટાઈટન્સે બે વર્ષ પહેલા 2022ની સિઝનમાં ડેબ્યૂ કર્યું અને પહેલી જ સિઝનમાં ટાઈટલ જીતીને ઈતિહાસ રચ્યો. બાદમાં બીજી સિઝનમાં ટીમ ફરીથી ફાઈનલમાં પહોંચી પરંતુ છેલ્લા બોલ પર વિજય તેમના હાથમાંથી સરકી ગયો. આવી સ્થિતિમાં IPL 2024ની સિઝનમાં પણ તેની પાસેથી આવી જ અપેક્ષાઓ હશે, પરંતુ આ વખતે ટીમ ઘણી બદલાઈ ગઈ છે અને હવે તેમની સામે ઘણા પડકારો પણ છે.
હાર્દિક-શમી વિના પહેલીવાર મેદાનમાં ઉતરશે ગુજરાત
ગુજરાતની સફળતામાં બે ખેલાડીઓએ હાર્દિક પંડ્યા અને મોહમ્મદ શમીએ મોટી ભૂમિકા ભજવી હતી. સતત 2 સિઝન સુધી ટીમના કેપ્ટન રહેલા હાર્દિક પંડ્યાએ ટીમનું નેતૃત્વ સારી રીતે કર્યું હતું પરંતુ હવે તે પોતાની જૂની ટીમ મુંબઈ ઈન્ડિયન્સમાં પાછો ફર્યો છે અને ત્યાંનો કેપ્ટન બની ગયો છે. બીજી તરફ ફાસ્ટ બોલર મોહમ્મદ શમી ગુજરાત ટાઈટન્સમાં હોવા છતાં ટીમનો ભાગ નથી, કારણ કે તે ઈજાના કારણે આખી સિઝનમાંથી બહાર છે. શમીએ આ બે સિઝનમાં 33 મેચમાં 48 વિકેટ ઝડપી હતી.
નવા કેપ્ટન ગિલ પાસે મજબૂત વિકલ્પો
હવે આટલા બે મોટા અને અનુભવી ખેલાડી ન હોવાથી ટીમ દબાણમાં રહે તે સ્વાભાવિક છે. ટીમની કમાન યુવા બેટ્સમેન શુભમન ગિલને સોંપવામાં આવી છે, જેની પાસે કેપ્ટનશિપનો કોઈ અનુભવ નથી. આવી સ્થિતિમાં ટીમ સારૂ પ્રદર્શન કરવામાં નિષ્ફળ જાય તો નવાઈ નહી. તેમ છતાં શુભમન ગિલ અને કોચ આશિષ નેહરા પાસે કેટલાક એવા ખેલાડીઓ છે જેમની સાથે તેઓ મજબૂત અને પડકારજનક પ્લેઈંગ ઈલેવન તૈયાર કરી શકે છે અને ટીમોને મુશ્કેલીમાં મૂકી શકે છે. તે વિકલ્પો કયા છે, ચાલો એક નજર કરીએ.
કોણ હશે 4 વિદેશી ખેલાડીઓ?
સૌ પ્રથમ, જો આપણે 4 વિદેશી ખેલાડીઓની વાત કરીએ, તો તે એક પડકાર સમાન છે કારણ કે ટીમ પાસે કેટલાક શ્રેષ્ઠ વિકલ્પો છે. આમાં લેગ સ્પિનર રાશિદ ખાન અને વિસ્ફોટક બેટ્સમેન ડેવિડ મિલરનું રમવાનું નિશ્ચિત છે. કેન વિલિયમસન જેવા મોટા નામ સહિત બાકીના બે સ્થાનો માટે ઘણા દાવેદાર છે, પરંતુ ટીમની સ્થિતિને જોતા તેના માટે રમવું મુશ્કેલ જણાય છે. અફઘાન ટીમના લેફ્ટ આર્મ સ્પિનર નૂર અહેમદને તક મળી શકે છે. સવાલ એ છે કે ટીમે ઓલરાઉન્ડર અઝમતુલ્લા ઓમરઝાઈને મેદાનમાં ઉતારવો જોઈએ કે કોઈ વિદેશી ફાસ્ટ બોલરને, જેના માટે સ્પેન્સર જોન્સન અને જોશ લિટલના રૂપમાં બે વિકલ્પ છે.
બેટિંગમાં છે વિવિધતા
હવે બેટિંગની વાત કરીએ તો, અનુભવી વિકેટકીપર-બેટ્સમેન રિદ્ધિમાન સાહા કેપ્ટન શુભમન ગિલ સાથે ઓપનિંગ કરશે, જ્યારે સાઈ સુદર્શન ત્રીજા નંબર પર રહેશે. ત્યારબાદ મિલર સાથે મિડલ ઓર્ડરની જવાબદારી શાહરૂખ ખાન સંભાળી શકે છે. જો કે ટીમ ઓલરાઉન્ડર વિજય શંકરને પણ મેદાનમાં ઉતારી શકે છે જે એક સારો વિકલ્પ છે. રાહુલ તેવટિયા ફિનિશિંગ માટે છે.
મજબૂત બોલિંગ એટેક
બોલિંગમાં સ્પેન્સર જોન્સનની સાથે ઝડપી બોલિંગમાં મોહિત શર્મા અને ઉમેશ યાદવનો ઉપયોગ કરી શકાય છે. બાકીના સ્પિન વિભાગમાં રાશિદ અને નૂરની જોડી હશે. ઈમ્પેક્ટ પ્લેયરના વિકલ્પને કારણે ટીમ જરૂરિયાત મુજબ સ્પિનર સાઈ કિશોર અથવા બેટ્સમેન અભિનવ મનોહરને મેદાનમાં ઉતારી શકે છે, જેઓ આ બંને શાહરૂખ ખાન અથવા સાઈ સુદર્શનનું સ્થાન લઈ શકે છે.
ગુજરાત ટાઈટન્સની સંભવિત પ્લેઈંગ 11:
શુભમન ગિલ (કેપ્ટન), રિદ્ધિમાન સાહા (વિકેટકીપર), સાઈ સુદર્શન, ડેવિડ મિલર, શાહરૂખ ખાન, રાહુલ તેવટિયા, રાશિદ ખાન, નૂર અહેમદ, ઉમેશ યાદવ, સ્પેન્સર જોન્સન, મોહિત શર્મા.