સાંતાક્રુઝ-ઈસ્ટના ઍર ઇન્ડિયા ગ્રાઉન્ડ પર શ્રી વાગડ કલા કેન્દ્ર આયોજિત ટી. કે. રુબી વાગડ પ્રીમિયર લીગ (વીપીએલ) સીઝન-ટૂમાં ગઈ કાલે લીગ રાઉન્ડના બન્ને મુકાબલામાં પ્રથમ બૅટિંગ કરનાર ટીમનો વિજય થયો હતો. રંગોલી વાઇકિંગ્સ અને સ્કૉર્ચર્સે સીઝનની ચોથી જીત મેળવી હતી, જ્યારે ટીમ આવિષ્કારે સીઝનમાં પ્રથમ વાર પરાજયનો સ્વાદ ચાખ્યો હતો.
રંગોલી વાઇકિંગ્સે હૅટ-ટ્રિક જીત સાથે પૉઇન્ટ ટેબલમાં બીજું અને સ્કૉર્ચર્સે ત્રીજું સ્થાન મેળવી લીધું હતું.
મૅચ ૧૯ : રંગોલી વાઇકિંગ્સ (૨૦ ઓવરમાં પાંચ વિકેટે ૧૬૪ રન – રજત સત્રા ૩૯, રિશી ફરિયા ૩૧ અને રુષભ કારિયા ૨૯ રન, કુણાલ નિશર ૨૭ રનમાં બે તથા ભાવેન ગિંદરા ૧૬ રનમાં અને મેહુલ નંદુ ૩૪ રનમાં એક-એક વિકેટ)નો એમ્પાયર વૉરિયર્સ (૨૦ ઓવરમાં સાત વિકેટે ૧૨૨ રન – રોમલ ગડા ૩૬, ઊર્મિલ વીસરિયા ૩૪ અને સંજય ચરલા ૨૧ રન, રુષભ કારિયા ૧૪ રનમાં અને વિરલ શાહ ૨૧ રનમાં બે-બે તેમ જ ફેનિલ ગડા ૯ રનમાં એક વિકેટ) સામે ૪૨ રનથી વિજય. મૅન ઑફ ધ મૅચ : રુષભ કારિયા (૧૬ બૉલમાં ૨૯ રન, ૧૪ રનમાં બે વિકેટ).
મૅચ ૨૦ઃ સ્કૉર્ચર્સ (૨૦ ઓવરમાં સાત વિકેટે ૧૪૨ રન – પલક સાવલા ૩૭, કુશ ગડા ૩૫ અને રોનક ગાલા ૨૬ રન, હર્ષલ નંદુ ૨૦ રનમાં બે તથા રુષભ દેઢિયા ૧૮ અને મેહુલ ગાલા ૩૦ રનમાં એક-એક વિકેટ) ટીમ આવિષ્કાર (૧૯.૨ ઓવરમાં ૧૨૧ રનમાં ઑલઆઉટ – હર્ષ ગડા ૫૮, પવન રીટા ૨૩ અને હર્શુલ નંદુ ૧૪ રન, મિહિર બૌવા ૧૮ અને પ્રથમ ગાલા ૩૦ રનમાં ૩-૩ વિકેટ તેમ જ પલક સાવલા ૨૯ અને દીપ ગડા ૨૩ રનમાં બે-બે વિકેટ) સામે ૨૧ રનથી વિજય. મૅન ઑફ ધ મૅચ : પલક સાવલા (૨૯ બૉલમાં ૩૭ રન, બે વિકેટ અને એક કૅચ).
હવે દસેક દિવસના ક્રિસમસ બ્રેક બાદ બીજી જાન્યુઆરીએ ફરી લીગ રાઉન્ડની શરૂઆત થશે જેમાં સવારે ૯ વાગ્યે સ્કૉર્ચર્સ v/s એમ્પાયર વૉરિયર્સ તથા બપોરે ૧ વાગ્યે પૂર્ણલબ્ધિ બુલ્સ v/s રોઝવૉલ્ટ સનરાઇઝર્સ વચ્ચે ટક્કર જામશે.